CHERITA LANGAU

Udah meh nyepi diri kenyang makai butt bangkai Sawa enggau Remaung Raras nya dia Bandau nya tadi lalu nudok kediri serta mulir mulir mulut iya ke nyau abis balut bout ke diempa iya tadi. Nama agi deh nyau ngabu bau but bangkai Sawa enggau Remaung Raras nyau udah dikerumbak Bandau. Enda lama udah nya Langau pan lalu datai laban iya ke sigi lansik bendau ensium bau utai ke bebau bout. Iya meh nyau semak serta dipeda bangkai Sawa nya tadi Langau pan lalu beguai ga nyapa Bandau.

“Nama gaga nuan dia deh Bandau tak nyau bedemoh lalu lantang bendar gamal mua nuan dipeda aku sehari tu,” pia ko Langau.

“Eh, sinu ke tudah Sawa tu udah ninggal ke kitai sehari tu tadi, enda nemu nama utai ke tau munoh iya. Lalu aku tu ngibun bangkai Sawa tu, enggai ka ditutu indu utai lagi,” pia ko Bandau nyaut Langau.

“Indu utai dalam babas tu tak nyelai bendar, deka bendar betutu ka utai bout. Nya alai aku ngibun bangkai Sawa tu enggai ke sida tak nyamai bendar lalu betelu ba bangkai iya tu lagi,” ko Bandau ga nampong jako iya baru laban iya sigi nemu Langau nya sigi semacham ari raban indu utai dalam babas ke ka bendar betelu ba utai ti bebau serta boutserta betutu ke utai ke baka nya.

Dia meh Langau nyau terbai kin kitu ngelingi bangkai Sawa nya tadi. Nama nya inggap baka ke ka nyabak tang enda ga nyadi lalu angkat ga terbai baru sebelah nya dia. Ka ati Langau nya lalu inggap ba bangkai Sawa nya tadi enda ga nyamai bendar ati , enggai kediri dianu Bandau laban Bandau udah madah kediri sigi nyaga bangkai Sawa nya tadi.

“Agi lama nuan ngibun bangkai Sawa nya ditu ?” pia ko Langau nya nanya Bandau.

“Enda aku tu tak tentu lama agi deh, lama bendar ga aku tu udah ngibun ditu kediri diri tadi sebedau nuan ke datai, laban tadi nadai ga orang bisi ngachau bangkai iya” pia ko Bandau ga nyaut Langau nya tadi.

“Enti nuan nyau lelak ga nyaga bangkai Sawa tu, lagi meh aku nganti nuan. Kasih aku meda nuan nyau baka ke buntau ka tindok tadi,” pia ko Langau bejako.

“Enda iboh pan kita nyilih aku. Ulih aku ngibun bangkai Sawa tu kediri baka ke sehari tu tadi,” pia ko Bandau nyaut Langau.

Udah nya tadi Bandau pan nyau lama agi chudur agi ga mata iya laban ke nyau ngantok bai ti kelalu kenyang makai bout Sawa enggau Remaung Raras. Nyau kepuas Bandau ke baka nya iya pan lalu tindok enda jauh ari bangkai Sawa nya tadi. Meda baka nya Langau pan lalu beguai guai ga inggap serta nesau semua kaban iya mai besaup nutu bout bangkai Sawa enggau Remaung Raras nya tadi.

Nama agi deh nyau chelum bout Sawa enggau Remaung raras nya tadi alai bala sida Langau ingap ngidup kediri bepakai ka bout nya serta betelu dia. Nyau ke pengelama baka nya semua sida Langau seraban pan nyau kenyang serta enggai nyadi betelu agi. Udah nya sida pan lalu terbai mulai kediri mai ati ti naka iya pengaga laban enggai ke Bnadau nya tadi dani lalu meda pemaioh telu sida Langau ba bout Sawa nya.

Apin lama sida Langau udah terbai ninggal ke Bandau ke ngibun bout Sawa nya alai Bandau pan lalu tedani, Bandau pan lalu bejako kediri.

“Jampat bendar perut aku tu lalu lapar baru. Tak asai ke enda lama aku tu tindok tadi,” pia ko Bandau.

Iya lalu mansang begadai gadai ngagai bout bangkai Sawa nya tadi laban ke agi lembau bekau ke baru dani tindok. Datai iya dia peda iya nyau burak telu sida Langau ba bout bangkai Sawa nya tadi. Bisi sekeda telu nya nyau udah mechah lalu nyadi ulat ke nyau baka gimut bejalai ba bout nya.

“Ngachau bendar sida Langau nya tadi tak semina datai lalu ngamah ke utai diempa aku aja. Dini enda utai empa aku nyau abis bulat, ukai nya bekasut kaki sida ke berindik ke bangkai Sawa dia tadi. Sapa ke deka makai utai ke nyau bulat baka nya,” pia ko Bandau bejako mutap kediri.

Iya lalu mupok ninggal ke bout nya lalu sirut sirut nyabak laban sayau ke bout Sawa enggau Remaung Raras nya tadi ke enggai nyadi diempa iya agi udah ke abis bulat laban telu Langau.

“Tulah sida Langau ngaga utai empa aku baka nya ila, nya alai sida Langau ila endang tak beridup nutu serta bepakai ke utai kamah belama,” pia ko sumpah Bandau.